10.12.2009 Mambo & Mitch
Mir si geschter Abe guet daheim acho mit üsne zwöi Jungs.Si hei säch aus tapfer ghaute uf dr fasch stündige Outofahrt. Aus erschts hei si uf ganz vorsichtige Pfote di ganzi Wohnig genau betrachtet. Dr Mitch het säch aber nach dr kurze Erkundigstour müesse ergäh, d Müdigkeit isch eifachz gross gsy. Er isch när zu mir uf z Sofa cho u het fridläch gschlafe.
Dr Mambo hingege het aues gnau wöue aluege u het säch meh Zit gno zum aues aluege. D Energie eht sogar no glängt zum kli spiele u mit em Christian z raufe. Aber o er isch när nach ärä Stund zu üs uf z Sofa cho u het uf minä Bei gschlafe.Si hei beidi scho flissig gschnürrelet u d Stricheleinheite sichtläch gnosse.
D Nacht hei si o guet überstande. Si si ganz brav gsy u mir hei sä hüt Morge schlafend ufemSofa vorgfunde. Wo mir üs am parat mache si gsy, si ihri Lebensgeischter o wider erwachet u si si ufgweckt dr d Wohnig spaziert. Dr Mambo het mir im Badzimmer sogar bim frisiere zuegluegt. Aber d Badwanne isch de plötzläch doch no interessanter gsy. Bis er haut de isch inegheit! Er het mi ganz vrdutzt agluegt u d Welt nid vrstande. Eh nu, wenigschtens isch ke Wasser dinne gsy.
Mir hei ganz fescht Fröid a üsne zwöi Jungs u möchte öich nomau ganz fescht MERCI sägä,
dass mir denä zwöi dörfe es daheim gäh.
I schicke öich no grad es paar Föteli mit.
Liebi Grüessli us Bern Christian u Angela mit Mambo und Mitch
